10 maýsymda Astana qalasyndaǵy Qazaqstan Respýblıkasynyń Ulttyq akademııalyq kitaphanasynda rýhanı-tanymdyq «ALQA» radıosynyń 1 jyldyǵyna oraı respýblıkalyq dóńgelek ústel ótti, dep jazady Egemen.kz.
Dóńgelek ústel Astana qalasy Máslıhatynyń tóraǵasy Tabıǵat Qabdenuly Zeınulqabdenniń quttyqtaý sózimen ashyldy. Máslıhat tóraǵasy jańa zaman talabyna saı jumys istep otyrǵan aqparat quralynyń qysqa ýaqyt ishinde qoǵamnan óz ornyn alǵanyn ataı kele, shyǵarmashylyq ujymǵa alǵysyn bildirdi. QR Mádenıet jáne aqparat mınıstrligi Din isteri komıtetiniń Basqarma basshysy Japal Ámzebekuly Radıoarnanyń óz maqsatyna saı, kásibı túrde habar taratyp otyrǵanyn basa aıtty.
Bas baıandamany «ALQA» radıosynyń Bas redaktory Serik Seıitman jasady. Baıandamada Radıoarnanyń keshegi, búgingi jaǵdaıy men bolashaqqa jospary jan-jaqty tanystyryldy. Jumystyń nólden bastalǵanyn atap ótken Bas redaktor bir jyldyń ishinde Radıonyń atyn qoıýdan bastap, stýdııany jasaqtaý, zamanaýı qurylǵylarmen jabdyqtaý, kásibı mamandardy tartý, rýhanı-aǵartýshylyq baǵyttaǵy baǵdarlamalar ashý, baǵdarlamalar kestesin qurý, ımıdjdik rolıkter men ánder qoryn qayptastyrý, áleýmettik jelilerdegi jumysty jolǵa qoıý, mobıldik qosymsha, resmı saıtty iske qosý sekildi san salaly jumystardyń tııanaqty júıelengenin baıandady:
«2024 jyldyń 10 maýsymynda Qazaqstan Respýblıkasynyń Memlekettik Ánuranymen efırdegi jumysymyzdy bastadyq. Qyzyqty qarańyz, araǵa 18 kún salyp – 28 maýsymdaǵy Jýrnalısterdiń kásibı merekesinde Prezıdentimiz Qasym-Jomart Toqaev jıyrmasynshy ǵasyr basyndaǵy qazaq zııalylarynyń baspasózge túgel atsalysyp, bul salaǵa aǵartýshylyq sıpat bergenin atap ótti. Jáne aǵa býynnyń sara jolyn laıyqty jalǵastyrý qajet ekenine aıryqsha toqtaldy. Bul – Alashtyń amanatyn arqalaǵan «Alqa» radıosynyń aty da, zaty da memlekettik mańyzǵa ıe degen sóz!».
Serik Seıitman «Alqa» radıosy 100 paıyz óziniń tól ónimderin efırge shyǵaryp keletinin de tilge tıek etti:
«Osy oraıda bizdiń youtube arnamyzdaǵy baǵdarlamalarymyzǵa otandyq eki telearnanyń yqylasy aýyp otyrǵanyn atap óteıin. Basshylary bizge shyǵyp, efırimizge qoısaq degen usynys aıtqanyna biraz boldy. Al olarǵa kelisim berý jaǵy zańgerimiz ben shyǵarmashylyq keńestiń aldaǵy sharýasy dep bilemin», – deı kelip, Radıoarnanyń bolashaqtaǵy josparymen de bólisti:
«Alda tolqynnan jıilik alý josparymyz bar. Jańalyqtar qyzmetin iske qosý, aqparattyq reportajdar taratý, tyńdarmandarmen tikeleı efırde keri baılanys ornatý sekildi Radıoarnany janrlyq jaǵynan túletý isi de sol kúnderdiń enshisinde dep bilemin. Bul – qarjy men qajyrdy tıimdi jumsaýǵa baılanysty qurylǵan strategııalyq damý baǵdarlamamyzdyń utymdy tusy».
Qazaq radıosynyń ardagerleri, dańqty dıktorlar Saýyq Jaqanova men Amanjan Eńsebaıuly sharaǵa qurmetti qonaq retinde shaqyryldy. Olar dástúr men jańashyldyqqa baılanysty óz tájirıbelerimen bólisti, «ALQA» radıosynyń jumysyn óte joǵary baǵalap, izbasarlaryna aq batasyn berdi.
Astana qalasy Máslıhatynyń depýtattary men Qalalyq qoǵamdyq keńes músheleri, basqarma basshylary men sala mamandary jáne zııaly qaýym ókilderi aqparat pen aǵartýshylyq taqyrybynda kásibı pikirlerin ortaǵa saldy. Olardyń qatarynda Astana qalasy ákimdiginiń Din isteri jónindegi basqarma basshysy Qaırolla Kóshqalı jáne qoǵam qaıratkerleri Serik Táýkebaev, Tólegen Qýanyshev, Qanat Estek, alashtanýshy ǵalymdar Aıgúl Ismaqova, Qaırat Saq, belgili din mamany Nurlan Baıjigituly bar.
О́ner zertteýshileri, dáýlesker kúıshiler Aıtjan Toqtaǵan men Ahat Baıbosynov kúıden qonaqkáde usynyp, ánshi-aktrısa Altynaı Nurbek tamyljyta án shyrqady. Shara aıasynda Ashat Bozymbaı men Gaýhar Qanatbaı bastaǵan qolóner sheberleriniń kóshpeli kórmesi uıymdastyrylyp, teatr jáne kıno akteri Ádil Ahmetov, rekordshy Temir Sypataı óz ónerlerin ortaǵa saldy. Atalǵan ónerpazdardyń bári «ALQA» radıosynyń baǵdarlama júrgizýshileri.
Rýhanı-tanymdyq «ALQA» radıosy 2024 jyldyń 4 maýsymy – Qazaqstan Respýblıkasynyń Memlekettik Rámizderi kúninde saltanatty túrde tanystyrylyp, 10 maýsym kúni tańǵy saǵat 6:00-de Qazaqstan Respýblıkasynyń Memlekettik Ánuranymen efırdegi jumysyn bastady.
«ALQA» radıosy dinı ekstremızm men terrorızmge qarsy úgit-nasıhat jumystaryn júrgizý maqsatynda: tól mádenıetimizdi, dástúrli dinimizdi, tarıhymyzdy, dástúrimizdi jáne tóltýma ónerimizdi nasıhattaýǵa baǵyttalǵan tanymdyq baǵdarlamalardy taratady. Qazaqstannyń zaıyrly memleket ekenin, memleket qurýshy qazaq halqynyń tól dúnıetanymy men turmys-saltyn, salt-dástúrin shynaıy túrde nasıhattaýdy, otandyq jáne sheteldik radıotyńdarmandarǵa Qazaq elin beıbitsúıgish memleket retinde tanytý, el azamattary men elorda turǵyndaryn izgilik pen ımandylyqqa shaqyrý, qazaqtyń baı mýzykalyq murasy arqyly ultymyzdyń rýhanı jáne aqparattyq keńistigin sapaly dúnıelermen toltyrýdy kózdegen aqparat quralynyń habar tarata bastaǵanyna 2025 jyldyń 10 maýsymynda 1 jyl toldy.
"ALQA" radıosy qurylymdyq júıe boıynsha Din isteri jónindegi basqarmaǵa qaraıdy. Basqarma basshysynyń pikirinshe bastapqyda joba retinde jumysyn bastaǵan aqparat quraly qazir kásibı mamandardyń arqasynda shyǵarmashylyq ujym bop qalyptasty.